Pas një periudhe të vështirë në ditët e fundit, Vedat Muriqi iu kundërpërgjigj më së miri kritikëve, duke i shënuar gol Real Madridit.
Mbi të gjitha, me golin e tij, ai ia dhuroi një fitore të madhe Mallorcas ndaj Real Madridit në “Son Moix”.
Mallorca fitoi 2-1 në shtëpi, me golin e Vedat Muriqit në minutën e 91-të.
Ishte Mallorca, e cila po lufton për mbijetesë, që shënoi e para në këtë ndeshje, kur Manu Morlanes shënoi në minutën e 41-të.
Në pjesën e dytë, Reali barazoi në minutën e 88-të, me anë të Eder Militaos.
Kur Reali po niste aksionin e ri për të marrë një fitore në udhëtim, në skenë doli Muriqi me një kundërsulm vrastar, të cilin sulmuesi dardan e konkretizoi në mënyrë perfekte.
Ky ishte goli i 19-të i tij në La Liga, derisa ka edhe një asistim në emrin e tij.
Mallorca ka 31 pikë pas kësaj fitoreje, duke dalë nga zona e rënies.
Ndërkohë, Reali që po lufton për titull, me këtë humbje i lëndoi shpresat për një titull të 37-të në La Liga, pasi Barcelona momentalisht është katër pikë larg, me një ndeshje më pak.
Barça luan sonte në udhëtim tek Atletico Madridi, me ndeshjen që nis nga ora 21:00./GazetaExpress/
