Nënkryetari i parë i Lidhjes Demokratike të Kosovës, Agim Veliu, në një prononcim për Gazetën Express, ka thënë se është Lëvizja Vetëvendosje ajo që duhet të gjejë zgjidhje që të merren vesh për bashkëqeverisje. Ai ka konfirmuar se sot gjatë ditës nuk do të ketë takim për t’u marrë vesh në mes të Albin Kurtit e Isa Mustafës

Lidhja Demokratike e Kosovës thotë se është Lëvizja Vetëvendosje që duhet të gjejë një zgjidhje për të vendosur përfundimisht a do të merren vesh për koalicion.

Në një përgjigje të dhënë për Gazetën Express, nënkryetari i LDK-së, Agim Veliu, ka thënë se partia e Albin Kurtit është në pozicion që të ofrojë zgjedhjen, i pyetur për kushtet që kanë vënë Lidhja Demokratike në takimet e fundit.

”Ata duhet me gjetë zgjidhje, janë në pozicion që duhet me ofru zgjidhje”, deklaron Veliu i pyetur se ku ka ngecur marrëveshja.

Rrjedhimisht, nënkryetari i parë i LDK-së, ka thënë se sot nuk do të ketë një takim në mes të dy partive, pas tri ditëve radhazi kur në Kuvend të Kosovës janë takuar dy liderët, të shoqëruar nga nënkryetarët.

“Sot nuk kemi me u taku”, ka thënë ai shkurtimisht.

Veliu, ndërkaq, e ka konfirmuar se është pozita e kryeparlamentarit për të cilin nuk po pajtohen momentalisht me liderin e LV-së, Albin Kurti.

“LDK-ja i ka humbur zgjedhjet nuk është parti e parë, jemi të detyruar t’i presim hapat e LV-së që është përgjegjëse për krijim të institucioneve", thotë ai.

Lëvizja Vetëvendosje dhe Lidhja Demokratike e Kosovës janë takuar për tre ditë radhazi pas një pauze dyjavore si përpjekje për të finalizuar marrëveshjen për koalicion.

Mirëpo, diskutimet kanë ngecur pasi që Lëvizja Vetëvendosje nuk ka pranuar të negociojë me pozitën e kryeparlamentarit, post të cilin e ka marrë njeriu i dytë më i votuar në LV pas Albin Kurtit, Glauk Konjufca. /GazetaExpress/