Këngëtarja e njohur shqiptare Vesa Luma ka reaguar me shqetësim në rrjetet sociale për një dukuri që po prek fëmijët në mënyrë të ndjeshme – përdorimin e platformës virtuale Roblox.

Përmes një videoje të shpërndarë në Instagram, Vesa ka treguar përvojën e saj personale, duke treguar se djali i saj, Liani, kishte hyrë për disa ditë në këtë lojë. Ajo ka theksuar se, edhe pse Roblox duket si një platformë argëtuese dhe krijuese për fëmijët, ajo mund të fshehë rreziqe që nuk janë të dukshme për syrin e një fëmije.

“O Zot, faleminderit që më ke bërë atë nënën që disa e ‘përqeshin’ se i rri shumë afër djalit! Liani qëndroi vetëm disa ditë në Roblox, deri sa e bëmë të kuptojë vetë që është e keqe si lojë për të. Është alarmante situata,” shkruan këngëtarja.

Ky mesazh nuk është thjesht një rrëfim personal, por një thirrje për prindër të gjithë Shqipërisë për të qenë më të përfshirë në jetën digjitale të fëmijëve të tyre dhe për të monitoruar aktivitetet online të tyre. Vesa ngre pyetjen e rëndësishme: Sa i sigurt është interneti për fëmijët tanë?

Rreziqet e Roblox për fëmijët

Roblox prezantohet si një botë ku fëmijët mund të krijojnë, eksplorojnë dhe ndërveprojnë, por eksperti paralajmërojnë se platforma mund të përmbajë:

Përmbajtje të papërshtatshme për moshat e vogla, përfshirë skena dhune dhe mesazhe erotike.

Mundësi për komunikim me të panjohur përmes chat-it të brendshëm, duke i ekspozuar ata ndaj ngacmimeve virtuale ose kontakteve të fshehta me të rritur me qëllime të dyshimta.

Varësi digjitale, mungesë përqendrimi, ankth, probleme me gjumin dhe shkëputje nga realiteti.

Në Shtetet e Bashkuara dhe vende të tjera të botës janë ngritur padi ndaj kompanisë që menaxhon Roblox, për raste kur persona të rritur kanë përdorur platformën për të arritur kontakte me fëmijë.

Thirrja për ndërgjegjësim dhe veprim prindëror

Vesa thekson se edukimi i fëmijëve nuk ndalet në shkollë apo në shtëpi, por duhet të përfshijë edhe udhëheqjen në botën digjitale. Prindërit duhet të jenë të informuar, të vëmendshëm dhe të ndërhyjnë aktivisht për të garantuar sigurinë e fëmijëve në internet.

“Edhe kur gjithçka duket ‘lojë’, pas ekranit mund të fshihet diçka që nuk është aspak e pafajshme,” shkruan ajo.

Reagimi i Vesës është përshëndetur nga shumë ndjekës, veçanërisht prindër, të cilët ndanë përvoja të ngjashme. Kjo tregon se problemi është real, i prekshëm dhe në rritje, dhe kërkon ndërgjegjësim të menjëhershëm.

Në një kohë kur teknologjia dhe interneti janë pjesë integrale e përditshmërisë së fëmijëve, vigjilenca dhe ndërhyrja aktive e prindërve nuk është më një zgjedhje, por një domosdoshmëri. /GazetaExpress/