Gazetat në Itali paralajmërojnë se qeveria do të duhet të “përshpejtojë” nëse Italia dëshiron të mbetet një nga bashkëorganizatorët e EURO 2032, pasi aktualisht vetëm një stadium është “gati” për të pritur ndeshje në turneun final.

Që në vitin 2023, Federata Italiane e Futbollit dhe homologja e saj turke paraqitën një listë me 10 stadiume të propozuara për të pritur ndeshje në EURO 2032.

Meqë oferta u bë më pas e përbashkët, secili vend duhet ta reduktojë listën në pesë stadiume.

Nga 10 stadiumet që propozoi Italia, vetëm “Allianz Stadium” i Juventusit është aktualisht gati për të pritur ndeshje pa pasur nevojë për ndërtim apo rinovim shtesë.

Disa nga stadiumet e propozuara ende nuk janë ndërtuar, përfshirë projekte të reja në Milano, Roma dhe Cagliari.

Gjashtë stadiumet e tjera kërkojnë rinovime të mëdha për të përmbushur standardet e turneve ndërkombëtare: “Stadio San Nicola” në Bari, “Stadio Diego Armando Maradona” në Napoli, “Stadio Artemio Franchi” në Firenze, “Stadio Marcantonio Bentegodi” në Verona, “Stadio Renato Dall'Ara” në Bologna dhe “Stadio Luigi Ferraris” në Genova.

Sipas raportimeve më të fundit nga “La Gazzetta dello Sport”, Italia është prapa Turqisë sa i përket infrastrukturës për turneun dhe duhet të “përshpejtojë” nëse dëshiron që gjithçka të jetë gati brenda gjashtë viteve.

FIGC do të duhet të japë një përditësim mbi progresin e punimeve në stadiume në korrik, ndërsa deri në shtator duhet të informojë UEFA se cilat stadiume do të presin ndeshjet e EURO 2032.

Nëse gjithçka shkon sipas planit, punimet për disa stadiume të reja dhe projektet e rinovimit pritet të nisin në mars të vitit 2027./GazetaExpress/