Albin Kurti, përmes një video-mesazhi, pasi e çoi në Presidencë emrin e tij për mandatar, i ka bërë thirrje LDK-së që të kthehet në tavolinën e bisedimeve për koalicion. Ai thotë se është i hapur për gjetjen e një kompromisi me partinë e Isa Mustafës, ndërkohë tregon se qasja aktuale e LDK-së nuk është e duhura. “Merre ose lëre” e quan ai ofertën e Mustafës, të cilën VV-ja e ka refuzuar. “Kjo do të thotë: lëre”, shton lideri i Vetëvendosjes. Po ashtu, në këtë video, Kurti thotë se Glauk Konjufca do të mbetet kryetar i Kuvendit, duke rikonfirmuar edhe një herë se nuk e zhbën vendimin e 26 dhjetorit, pavarësisht se ky duket të jetë kushti kryesor i LDK-së

Albin Kurti ka sqaruar nëpërmjet një video-incizimi se Vetëvendosja e ka dorëzuar letrën për vendimin e mandatarit për formimin e Qeverisë së Kosovës, pa arritur një marrëveshje me Lidhjen Demokratike të Kosovës 

Ai thotë se deri sot nuk është dorëzuar ky vendim te presidenti për shkak se e kanë pritur LDK-në që të arrijnë një marrëveshje për bashkëqeverisje.

“Në mbledhjen konstituive të Kuvendit, më 26 dhjetor, shkova pa pasur një marrëveshje. Edhe te presidenti, më 6 janar, shkova pa marrëveshje paraprake dhe tani dy javë pas atij takimi katërminutësh, ende nuk kemi marrëveshje për qeverinë e re”, ka thënë Kurti në videon e publikuar pas vendimit që e ka dërguar në Presidencë.

Nëpërmjet kësaj videoje ai edhe një herë i ka bërë ftesë LDK-së që të merren vesh pavarësisht se ishte VV-ja e fundit që i refuzoi propozimet e partisë së Isa Mustafës.

KY ËSHTË MESAZHI I PLOTË I KURTIT

Ne sot po e dërgojmë propozimin tonë me shkresë te Presidenti. Sekretarja jonë organizative, Vlora Haxhimehmedi, do ta bëjë këtë.

Ne nuk e kemi pranuar propozimin e fundit të drejtuesve të LDK-së por jemi treguar shumë të gatshëm për takime të mëtejme me synim gjetjen e alternativave tjera që do ishin të pranueshme për të dy palët.

E theksoj përsëri: nuk mund të kthehemi në të kaluarën, nuk mund të kthehemi në vitin 2019. Ata s'e kanë pranuar propozimin tonë të fundit, ndonëse, ndryshe nga dakordimi, nuk e trajtuan fare në Këshillin e tyre të Përgjithshëm. Qëndrimi se takohemi vetëm për ceremoninë e nënshkrimit të marrëveshjes, pra, qasja “Merre ose lëre”, do të thotë lëre.

Unë besoj se ne mund të kthehemi dhe e kemi detyrim ndaj të gjithë jush që të kthehemi në tavolinën e bisedimeve, për të mos dalë nga ajo deri në gjetjen e një gjuhe të përbashkët dhe arritjen e marrëveshjes sonë.

Ne, si Lëvizje VETËVENDOSJE! kemi marrë madatin ta bëjmë qeverinë që ju e dëshironi, e që vendit i duhet me aq urgjencë. As më shumë e as më pak.

E kemi filluar duke e çliruar nga kapja, udhëheqjen e Kuvendit: nuk është më aty ai Pronto kryeparlamentari që shante e kërcënonte nga foltorja, por kryetari i ri, Glauk Konjufca.

Unë besoj se ne mund të kthehemi e duhet të kthehemi në tavolinën e bisedimeve.

Në ditët në vijim do të takoj edhe përfaqësuesit e pakicave.

Ju falemnderit e mirupafshim.