Viktor Gyökeres ka zbuluar kuptimin pas festimit të tij të ri, pasi tifozët e Arsenalit vunë re gjestin e tij pas shënimit të penalltisë.

Gyökeres hapi llogarinë e tij me Arsenalin në fitoren 5-0 ndaj Leeds United të shtunën. Ai shënoi golin e tij të parë në Premier League vetëm tre minuta pas rifillimit, pasi finalizoi qetësisht pas një depërtimi në zonë.

Sulmuesi suedez festoi me gjestin e tij të njohur, duke kryqëzuar gishtat për të formuar një “maskë” mbi gojë. Ai e përsëriti këtë festim edhe pas realizimit të penalltisë në kohën shtesë, të fituar nga Max Dowman, por shtoi një element tjetër që nuk i shpëtoi vëmendjes së tifozëve të Arsenalit: pas “maskës”, Gyökeres kaloi gishtat në flokët e tij, sikur po i rregullonte me shaka.

Duke folur për Sky Sports pas ndeshjes, Gyökeres konfirmoi se ky festim i ri ishte një përgjigje ndaj kritikave online, pasi tifozët rivalë e tallën me statistikat e tij pas paraqitjes kundër Manchester United javën e kaluar. Ata bënë shaka se kishte më shumë rregullime flokësh sesa prekje topi në Old Trafford.

Kur u pyet nga Dave Jones nëse festimi ishte përgjigje ndaj atyre që e tallën pas debutimit, Gyökeres buzëqeshi dhe tha: “Po… ndoshta.”

Gyökeres realizoi dopietë në debutimin e tij në Emirates, pasi nuk kishte shënuar kundër Man United. Ai shënoi golin e tretë ndaj Leeds përpara se të mbyllte rezultatin me penallti në minutat shtesë.

Pas dy golave të tij, 27-vjeçari shprehu kënaqësinë për paraqitjen dhe rezultatin e thellë:
“Sigurisht që jam shumë i lumtur për rezultatin. Ishte shumë bukur të shënoja dy gola gjithashtu,” tha ai për Sky Sports.

“Gjithmonë ka presion. E di që do t’i shfrytëzoj rastet herët a vonë. Fitore 5-0, një ditë e mrekullueshme.
Sigurisht, ishte një parasezon i shkurtër për mua, jo shumë javë stërvitje dhe më pas të luaja 90 minuta në parasezon. Ishte e rëndësishme të merrja 90 minuta për të hyrë në ritëm dhe për t’u njohur më shumë me ekipin gjatë kësaj ndeshjeje.”

Gyökeres shtoi: “U ndjeva më komod me mënyrën se si po luajmë, dhe besoj se edhe ju e patë këtë. Ndihem mirë kur topi vjen prapa mbrojtjes dhe më pas të futem brenda. E di që do ta shfrytëzoj rastin kur e kam kështu.

Kemi shumë lojtarë fantastikë në sulm. Për mua është e rëndësishme të jem në vendin e duhur. Është e vështirë. Të gjitha skuadrat duan të na sfidojnë. Duhet të përgatitemi sa më mirë për çdo ndeshje, por kemi një ekip të jashtëzakonshëm, stërvitemi dhe punojmë shumë çdo ditë.

Kemi nisur shumë mirë me dy fitore, dy ndeshje pa pësuar gol dhe shumë gola të shënuar. Mendoj se jemi në rrugën e duhur, por gjithmonë mund të bëjmë më mirë dhe të përmirësohemi.”/GazetaExpress/