Vinicius Jr. bëri një ‘kërcënim’ të fortë ndaj Xabi Alonsos dhe Real Madridit pas zëvendësimit të tij kundër Barcelonës.
Reali siguroi një fitore të madhe ndaj rivalëve të përjetshëm, Barcelonës, në “El Clasicon” e së dielës, duke e thelluar epërsinë në krye të La Ligës me pesë pikë.
Kylian Mbappe hapi serinë e golave, ndërsa Fermin Lopez barazoi pas një pasimi nga Marcus Rashford.
Jude Bellingham shënoi golin vendimtar për Realin dy minuta para pushimit, duke përfituar nga afër portës.
Në ndeshje pati disa momente tensioni, përfshirë dy kartonë të kuq: rezervisti Andriy Lunin u përjashtua pas një incidenti pranë vijës anësore, ndërsa Pedri mori kartonin e dytë të verdhë në minutat shtesë të pjesës së dytë.
Edhe pse Vinicius Jr. nuk shënoi, ai mori vëmendjen për reagimin e tij shpërthyes ndaj zëvendësimit, si dhe për përplasjen me Lamine Yamal pas përfundimit të ndeshjes.
Në minutën e 72-të, Alonso e zëvendësoi Viniciusin, i cili reagoi duke ngritur duart në ajër.
Sipas “DAZN”, teksa dilte nga fusha e “Bernabeut”, sulmuesi brazilian thuhet se tha me nervozizëm: “Unë? Trajner? Trajner, unë? Gjithmonë unë. Po largohem nga ekipi. Më mirë të iki”.
Alonso u përpoq ta qetësonte, duke iu përgjigjur: “Hajde, Vini, dreqi ta marrë”. Ndërsa shikonte drejt tavanit të “Bernabeut”, Vinicius shtoi: “Më vraftë!”
Pavarësisht shpërthimit të tij, drejtuesit e Realit e kuptojnë frustrimin e tij për zëvendësimin, duke besuar se tregon sa shumë i intereson skuadra.
Megjithatë, duke qenë se ai është kapiteni i tretë i ekipit, ata pranojnë se duhet të kishte reaguar më qetë.
Pas ndeshjes, Vinicius Jr. tha:
“Një mesazh për të gjithë madridistët, sidomos për ata që erdhën në ‘Bernabeu’ dhe na mbështetën me pasion: Kështu është ‘El Clasico’, ka shumë gjëra që ndodhin brenda dhe jashtë fushës. Ne përpiqemi të ruajmë qetësinë, por kjo nuk është gjithmonë e mundur.
Nuk duam të ofendojmë askënd, as lojtarët e rinj, as tifozët. E dimë që kur hyjmë në fushë, duhet të luajmë rolin tonë, dhe kështu ndodhi sot”./GazetaExpress/
