Volejbollistja braziliane e ekipit të Dinamos, Nayara Ferreira, ka reaguar pas suspendimit të saj, pasi Federata Shqiptare e Volejbollit i ka kërkuar të vërtetojë gjininë përmes analizës së gjakut.

Në një intervistë për “Top Channel”, Ferreira, mes lotësh ka thënë se po kalon një situatë shumë të vështirë, të paprecedentë në karrierën e saj sportive.

“Kjo është një situatë shumë e vështirë për mua. Është hera e parë që përjetoj diçka të tillë në gjithë karrierën time. Luaj volejboll që nga mosha 12-vjeçare,” ka deklaruar ajo. “Jeta ime është private dhe unë jam person që i mbaj gjërat për vete. Ajo që po ndodh tani me mua është diskriminim. Nuk e pranoj këtë. Nuk më kanë dhënë asnjë arsye ligjore pse e bënë këtë. Kur pyeta një zyrtar të federatës, më tha se ‘është dokument privat’. Po çfarë është private për dikë tjetër në lidhje me jetën time?”

Ferreira tha se ndjehet e shkatërruar nga mënyra si është trajtuar dhe se gjatë gjithë karrierës ka luajtur në shumë vende pa u përballur kurrë me diçka të tillë.

Ajo e ka theksuar se është “100 për qind grua” dhe nuk ka pse të dëshmojë këtë para askujt.

“Jam 100% femër, dhe kjo është diçka që nuk kam pse ta shpjegoj. Ju vetëm keni parë si vishem, fizikun tim, flokët, tatuazhet. Ajo që keni bërë është diskriminim. Nuk e di si mund të flejë i qetë presidenti i federatës suaj me këtë në ndërgjegje. Nuk kam fjetur, nuk kam ngrënë, nuk kam pirë as ujë. Prandaj, faleminderit Federatës Shqiptare që ma bëtë këtë,” tha ajo me ironi.

Në fund, volejbollistja braziliane u shpreh se e vërteta do të dalë në dritë dhe se nuk ka asgjë për të fshehur.

Në mediat shqiptare ditë më parë u raportua për suspendimin e Nayara Ferreiras, me kërkesë të Federatës Shqiptare të Volejbollit, në pritje të verifikimit të dokumentacionit të saj.