Mbrëmjen e 18 dhjetorit, në një pyll në afërsi të Liqenit të Badovcit, është gjetur një trup i pajetë. Pas hetimeve të policisë u kuptua se bëhej fjalë për rojën e pyllit, Nazmi Rrustemi, punëtor i Inspeksionit të Prishtinës. Në trupin e pajetë të Rrustemit u gjetën shenja nga arma e zjarrit, ndërkaq ende nuk dihen rrethanat e vrasjes së tij. Policia ka nisur intervistimin e dëshmitarëve lidhur me rastin, shkruan Gazeta Express

Kishte dalë në zonën të cilën e ruante zakonisht, por mbrëmja e së mërkurës ishte fatale për rojën e pyllit, Nazmi Rrustemi, që ishte njëri prej inspektorëve më të vjetër të Komunës së Prishtinës.

Në vendin e tij të punës, 63-vjeçari nga fshati Keqekollë e Prishtinës, u qëllua për vdekje me armë zjarri.

Vetura e tij e punës ishte gjetur pak metra larg vendit ku ishte gjetur i vdekur Rrustemi.

E shkaqet e vrasjes së 63-vjeçarit janë ende të panjohur. Ndërkaq hetimet lidhur me vrasjen e Rrustemit janë ende në fazën fillestare.

Këtë e ka bërë të ditur për Gazetën Express Zyra për informim e Drejtorisë së Policisë në Prishtinë.

“Rasti është në fazën fillestare. Ka filluar intervistimi i disa personave në cilësinë e dëshmitarëve. Po punojmë me Prokurorinë për të zbardhur rastin”, thuhet në përgjigjen e zyrës për informim.

Si ndodhi e tërë ngjarja

Fillimisht, lajmin e gjetjes së një trupi të pajetë në rrethana të panjohura, e kishte konfirmuar policia.

“Mund të ju konfirmoj që me datë 18.12.2019, rreth orës 21:50, në një distancë nga rruga Graçanicë – Gjilan, në pyll është gjetur një person vdekja e të cilit është konfirmuar nga ekipi i ambulancës. Njësitet policore janë duke ndërmarrë të gjitha veprimet e nevojshme për të hetuar dhe sqaruar rrethanat e këtij rasti”, ka thënë zëdhënësi i Policisë së Kosovës, Daut Hoxha.

Ndërkaq, Prokuroria Themelore e Prishtinës, të enjten ka bërë të ditur për Express se dyshimet e para nga vendi i ngjarjes janë se Rrustemi është vrarë me armë zjarri.

“Në trupin e tij ka pasur plagë të cilat dyshohet se janë shkaktuar nga arma e zjarrit. Me urdhër të prokurorit, trupi i pajetë është dërguar në Institutin e Mjekësisë Ligjore për Obduksion”, ka thënë zëdhënësja e Prokurorisë Themelore të Prishtinës, Laureta Ulaj.

Ndërkohë Policia e Kosovës përmes raportit 24 orësh e kishte konfirmuar zyrtarisht se bëhet fjalë për vrasje.

“Fshati Mramor, Prishtinë 18.12.2019-19:00. Raportohet se është gjetur pa shenja jete në pyll viktima mashkull K-Shqiptar. Vdekjen e viktimës e ka konstatuar mjeku kujdestar ku shihet se viktima është qëlluar me armë zjarri. Në vendngjarje kanë dalë njësitë përkatëse dhe prokurori publik”, theksohet në raportin e policisë.

Gjatë të enjtes, në vendin e ngjarjes kanë dalë zyrtarë të forensikës si dhe të Policisë së Kosovës, për të bërë të gjitha analizat e nevojshme lidhur me rastin.

Për vrasjen e inspektorit të Komunës së Prishtinës, të enjten ka reaguar edhe i pari i kryeqytetit, Shpend Ahmeti.

Përmes një statusi në Facebook, Ahmeti iu ka bërë thirrje institucioneve të drejtësisë që të zbardhet rasti dhe kryesit e veprës të sillen para drejtësisë.

“Mbrëmë Drejtoria e Inspeksionit është lajmëruar se është gjetur vetura e braktisur/hapur e njërit prej inspektorëve më të vjetër të pyllit të Komunës së Prishtinës N. Rr. në afërsi të Badovcit. Fatkeqësisht, pas arritjes së policisë është gjetur edhe trupi i pajetë i të ndjerit, i vrarë me armë zjarri, në zonën që e ruante si roje pylli. Nga Policia kërkojmë që sa më parë të zbardhet rasti dhe kryesit e veprës të sillen para drejtësisë. Ky rast edhe njëherë dëshmon rrezikun me të cilin përballen Inspektorët e Komunës”, ka shkruar Ahmeti.

63-vjeçari Nazmi Rrustemi, baba i katër fëmijëve, është varrosur të premten në varrezat e fshatit Keqekollë të Prishtinës./GazetaExpress