Negociatat mes përfaqësuesve të fermerëve, të cilët që nga e mërkura po protestojnë dhe bllokojnë rrugët, dhe Ministrisë së Bujqësisë serbe, kanë dështuar. Fermerët atje, kanë paralajmëruar radikalizimin e protestave duke filluar nga sot

Fermerët u larguan nga takimi në Qeverinë e Serbisë me ministrin e Bujqësisë, Dragan Glamociq.

Sipas raportimit të N1, takimi zgjati rreth një orë. Fermerët deklaruan se duhej ta kishin braktisur më herët takimin, pasi, sipas tyre, ministri u përpoq të manipulonte si me ta ashtu edhe me temën e diskutimit. Ata thanë se nga Qeveria e Serbisë nuk u është ofruar asgjë konkrete.

Fermeri Milan Pajiq pas takimit u shpreh se ministri kishte tentuar t’i manipulonte dhe se u kishte thënë se në radhët e fermerëve ka “tradhtarë” që e informojnë atë për zhvillimet.

Kur fermerët theksuan se ekzistenca e tyre është e rrezikuar, ministri i pyeti pse merren me këtë aktivitet nëse nuk u leverdis. Sipas fermerëve, në takim nuk u ofrua asnjë zgjidhje konkrete, përveç premtimit se do të bisedohet me qumështoret dhe se ato do të ndëshkohen nëse nuk respektojnë kontratat.

Sipas raportimit të N1 nga Beogradi, radikalizimi i protestave pritet të nisë që sot, megjithëse nuk është saktësuar çfarë do të përfshijë konkretisht. Supozohet se kjo do të nënkuptojë angazhimin e një numri më të madh fermerësh dhe automjetesh në bllokada në disa pika të Serbisë.

Në fillim të takimit, ministri kishte deklaruar se shteti është i gatshëm për dialog dhe për të qëndruar në Qeveri deri në gjetjen e një zgjidhjeje. Ai i cilësoi protestat si “cirk” dhe tha se shpreson të diskutojë me fermerët për bujqësinë, jo për politikën.

Kur një nga fermerët e pyeti se kur kishin folur për politikë, ministri kërkoi që gazetarët të largoheshin nga takimi.