Me prezencën e ambasadorëve të QUINT-it dhe të shefes së Misionit të Bashkimit Evropian në Prishtinë, do të mbahet sot takimi i radhës në mes të Lëvizjes Vetëvendosje dhe Lidhjes Demokratike të Kosovës. Gazeta Express merr vesh se takimi është caktuar për në orën 17:00 në Kuvend të Kosovës.
Dje u tha se do të merren vesh përfundimisht për koalicionin ose që nuk mund të shkojnë bashkë në qeverisje. Mirëpo, takimi që zgjati gati tre orë në mes të LV-së dhe LDK-së, përfundoi edhe një herë pa epilog.
Teksa afati për mandatarin po shkon drejt fundit, partitë që ka muaj që janë ulur në tavolinë të diskutimit nuk po arrijnë të heqin dorë e të bëjnë marrëveshje, por po insistojnë në përmbushje të kërkesave.
Edhe një herë, Lidhja Demokratike ka shkuar në takim me kërkesën fillestare. Partia e udhëhequr nga Isa Mustafa, që dje shkoi vetë i shtati në takim, kërkoi nga LV-ja presidentin, kryeparlamentarin dhe pesë ministri si ofertë për koalicion.
Vetëvendosja as të hënën nuk e pranoi këtë kërkesë, duke ia përsëritur ofertën për shtim të numrit të ministrive. Nëse shkohet me 15 ministri, LV-ja merr 5 ministri, 7 LDK-ja dhe 3 minoritetet. Ndërkaq, nëse shkohet me 12, LDK-ja merr 6, ku përfshihet edhe MPJ-ja, LV-ja katër ministri dhe 2 minoritetet.
Kur kjo ofertë që është bërë edhe para vikendit, u refuzua për herë të fundit, partia e udhëhequr nga Albin Kurti propozoi që në diskutime të përfshihen edhe ndërkombëtarët.
Kështu, për sot në orën 17:00 siç merr vesh Gazeta Express është caktuar takimi me ambasadorët e QUINT-it dhe me shefen e misionit të BE-së në Prishtinë. Takimi do të mbahet në Kuvend të Kosovës.
Nënkryetarja e LDK-së, Vjosa Osmani, i ka thënë dje gazetës se takimi është informativ.
Megjithatë, sot kur ambasadorët do të njoftohen nga dy subjektet për rrjedhshmërinë e bisedimeve, nuk përjashtohet mundësia që atyre t'u kumtohet lajmi se marrëveshja në parim ka dështuar.
LV-së dhe LDK-së u kanë mbetur edhe pak ditë për t’u marrë vesh.
4 shkurti, në rast se e gjen vendim pa një marrëveshje për koalicion, mund të çojë në qeveri teknike, një koalicion të ri të partive tjera apo zgjedhje të reja. /GazetaExpress/
