I dërguari i posaçëm i presidentit amerikan Donald Trump, Steve Witkoff, ka deklaruar se bisedimet për paqen në Ukrainë kanë hyrë në fazën përfundimtare dhe se ka mbetur vetëm një çështje kyçe për t’u negociuar mes palëve.

Duke folur në Forumin Ekonomik Botëror në Davos, Witkoff theksoi se është shënuar përparim i konsiderueshëm në kontaktet diplomatike, të cilat SHBA-ja i ka zhvilluar si me Rusinë, ashtu edhe veçmas me Ukrainën dhe liderët evropianë.

“Nëse ekziston vullnet nga të dyja palët për ta zgjidhur këtë konflikt, atëherë një marrëveshje është e mundur”, u shpreh Witkoff, duke shtuar se procesi ka avancuar ndjeshëm.

Megjithatë, pavarësisht deklaratave optimiste, ende nuk është arritur një marrëveshje konkrete, ndonëse presidenti Trump ka përsëritur disa herë se synon t’i japë fund luftës në Ukrainë.

Një ditë më parë, Trump u shpreh në Davos se udhëheqësit e Moskës dhe Kievit do të vepronin “pa mençuri” nëse dështonin të arrinin një marrëveshje paqeje.

Witkoff bëri të ditur gjithashtu se pritej të udhëtonte drejt Moskës më vonë gjatë ditës, ndërsa fjalimin e tij e mbajti gjatë një takimi mbi të ardhmen e Ukrainës, ku morën pjesë edhe sekretari i përgjithshëm i NATO-s, Mark Rutte, dhe presidenti i Finlandës, Alexander Stubb.

Nga ana e tij, Rutte deklaroi se është i bindur për përkushtimin e Trumpit ndaj sovranitetit dhe pavarësisë së Ukrainës, duke theksuar se fokusi duhet të mbetet tek mbështetja për Kievin.