Xabi Alonso, trajneri i ri i Real Madridit, ka nisur punën për ndërtimin e skuadrës së tij në “Santiago Bernabéu”. Pas suksesit të madh me Bayer Leverkusen, ku fitoi Bundesligën pa asnjë humbje, tekniku bask po analizon me kujdes kontingjentin aktual të “Los Blancos” dhe ka përcaktuar qartë disa emra që nuk bëjnë pjesë në planet e tij.

Sipas burimeve pranë klubit, Alonso ka vendosur t’u hapë derën largimit pesë futbollistëve: Rodrygo Goes, Fran García, David Alaba, Dani Ceballos dhe Brahim Díaz.

Rodrygo Goes

Edhe pse ka kontratë deri në vitin 2028, braziliani ka humbur rëndësinë në skuadër. Alonso preferon sulmues më vendimtarë në situata “një kundër një” dhe më të qëndrueshëm në performancë.

Fran García

Mbrojtësi i majtë nuk ka bindur as Ancelottin më parë, e as stafin e ri teknik. Performancat e dobëta dhe pa impakt e bëjnë atë një kandidat të qartë për dalje nga klubi.

David Alaba

I lënduar shpesh, Alaba nuk ka arritur të ketë vazhdimësi dhe trajneri e sheh si rrezik për ekuilibrin e skuadrës. Shitja e tij është një mundësi për të liruar vend dhe paga në repartin defensiv.

Dani Ceballos

Mesfushori spanjoll nuk ka arritur kurrë të fitojë një vend titullari në Madrid. Me konkurrencën në mesfushë shumë të madhe, largimi i tij shihet si zgjidhje për të dyja palët.

Brahim Díaz

Pavarësisht disa paraqitjeve të mira, Brahim nuk ka arritur të vendoset si një element kyç në formacion. Ai është në listën e lojtarëve të transferueshëm dhe mund të largohet për më shumë minuta loje.

Xabi Alonso dëshiron një skuadër kompetitive, të balancuar dhe me zgjidhje më të qarta në fazën sulmuese. Për të ndërtuar këtë projekt të ri, ai konsideron të domosdoshme një rinovim të pjesshëm të grupit. Me largimet që afrojnë, “Real Madrid i ri” po merr formë – revolucioni ka filluar./GazetaExpress/