Pas dy ndeshjeve të zhvilluara të shtunën, sot Albi Mall Superliga e Kosovës rikthehet me tri duele tejet interesante, ku fokusi kryesor është në Gjilan, aty ku do të përballen rivalët e mëdhenj të viteve të fundit, Drita dhe Ballkani.

Të dyja skuadrat kanë nga 23 pikë në tabelë, vetëm tre më pak se lideri Prishtina. Drita ka një ndeshje më pak të luajtur dhe kërkon fitoren për t’iu afruar kreut, ndërsa kampioni në fuqi, Ballkani, pas dy humbjeve radhazi, synon të rikthehet fuqishëm nën drejtimin e trajnerit të ri.

Një përballje tjetër e fortë zhvillohet në Podujevë, ku Llapi pret Dukagjinin, ndeshje që pritet të sjellë intensitet dhe luftë për pikë të rëndësishme.

Në Ferizaj, skuadra vendase do të jetë nikoqire e Malishevës, në një takim po ashtu me peshë për garën në pjesën e poshtme të tabelës.

Të tre ndeshjet e ditës së diel nisin në orën 13:00 dhe pritet të sjellin emocione të forta në luftën për kreun dhe mbijetesën. /GazetaExpress/