Golden Eagle Ylli ishte protagonist i basketbollit kosovar në dy vitet e fundit.
Therandasit e fituan dy herë radhazi titullin e kampionit të Kosovës, ndërsa triumfuan edhe në Ligën Unike vjet.
E ekipi nga Suhareka synon të jetë protagonist edhe në sezonin e ardhshëm.
Ylli e ka prezantuar sot ekipin me të cilin do ta nisë sezonin e ri në Superligën e basketbollit, shkruan “Gazeta Express”.
Skuadrës edhe në sezonin e ardhshëm do t’i prijë trajneri Adis Beçiragiq, i cili e drejtoi ekipin me sukses në dy edicionet e fundit, ndërsa therandasit i konfirmuan edhe dy asistentët e tij, Petrit Zeqiri dhe Endrit Elshani.
Së fundmi, nga klubi u larguan dy lojtarët e rëndësishëm, Erjon Kastrati, i cili përfundoi në Trepçë dhe Mikaile Tmusic.
E në ndërkohë, Ylli do ta transferojë amerikanin e natyralizuar në kosovar, Scott Bamford.
Por, therandasit pritet të bëjnë edhe përforcime të tjera me lojtarë vendorë dhe të huaj gjatë verës. /Gazeta Express/
