Transferimi i Alex Baena nga Villarreal te Atletico Madrid gjatë verës u cilësua si një nga lëvizjet më të bujshme të merkatos, pasi mesfushori spanjoll ishte një nga lojtarët më kreativë në La Liga gjatë kohës së tij te “La Ceramica”. Megjithatë, Baena ka zbuluar se dikur ishte shumë pranë të heqjes dorë nga futbolli.

Në një intervistë për agjencinë EFE (përmes Marca), ai tregoi se gjatë sezonit 2023-24 përjetoi një periudhë të errët personale:

“Pas humbjes në finalen me U21 (në vitin 2023) dhe pas thirrjes sime të parë në kombëtaren e madhe, kalova një moment shumë të vështirë personal, madje me mendime për të lënë futbollin, për të hequr dorë nga gjithçka.
Por me ndihmën e një psikologu, me të cilin kam punuar prej kohësh, si dhe me mbështetjen e familjes, nënës dhe vëllezërve të mi, arrita të dal nga ajo gjendje. E kaluam të gjithë së bashku.”

Baena foli hapur edhe për anën e errët të jetës së futbollistit:

“Njerëzit shohin vetëm të mirën — të njohin në rrugë, mendojnë se gjithçka është pozitive. Por nuk e dinë pjesën tjetër: sakrificat, stërvitjet e vazhdueshme, mungesën e kohës me familjen, ushqimin e kontrolluar, mungesën e lirisë që kanë miqtë e tu. Futbolli duket i bukur nga jashtë, por është shumë i vështirë. Vetëm ata që janë pranë nesh e kuptojnë plotësisht.”

Në lidhje me përvojën e tij të parë te Atletico Madrid, Baena shprehu kënaqësinë dhe respektin për trajnerin Diego Simeone:

“Jam shumë rehat këtu. Njerëzit flasin pa e njohur dhomën e zhveshjes apo ‘Cholon’. Ai është ndryshe nga sa mendojnë. Flet shumë me mua, jep energji dhe pasion. Fjalimet e tij të motivojnë, të bëjnë të dalësh në fushë me dëshirë për të ‘ngrënë botën’. Është një nga trajnerët më të mirë në botë.”

Në fund, ai shtoi se Atletico nuk e pranon idenë e të qenit prapa Barcelonës apo Real Madridit:

“Nuk kam dëgjuar askënd të thotë se duam të jemi të tretët. Përkundrazi, gjithmonë flasim për fitore, për tituj. Edhe pse është shumë e vështirë të konkurrosh me Barcelonën dhe Realin, ne jemi këtu për të luftuar.”

Një rrëfim i sinqertë dhe njerëzor nga një lojtar që ka kaluar periudha të errëta, por tani po rilind në një nga klubet më të mëdha të Spanjës./GazetaExpress/