Para ndeshjes së Chelsea-t kundër Palmeiras në Kupën e Botës për Klube, Pedro Neto hyri në fushë jo vetëm si lojtar, por edhe si një mik i pikëlluar. I shoqëruar nga bashkëlojtarët, ai ngriti lart një fanellë të Chelsea-t ku ishin të shkruara emrat “Diogo” dhe “Andre” – në nderim të dy vëllezërve futbollistë që humbën jetën tragjikisht në një aksident automobilistik të enjten.

Para se të niste ndeshja, lojtarët e Chelsea-t qëndruan të bashkuar në vijën e mesfushës. Neto dhe Enzo Fernandez mbajtën fanellën e personalizuar, ndërsa pjesa tjetër e ekipit qëndronte e lidhur krah për krah, me kokat ulur në heshtje. U mbajt një moment reflektimi dhe nderimi në stadiumin Lincoln Financial Field në Filadelfia, Pensilvani. Ky gjest ishte pjesë e një varg homazhesh që përfshiu edhe artistë si Oasis, si dhe yje sporti si LeBron James dhe Mohamed Salah.

Gjatë ceremonisë, stadiumi uli dritat dhe shfaqi një fotografi prekëse të Diogo Jotës dhe Andreut së bashku gjatë karrierës së tyre të hershme te Paços de Ferreira. Edhe lojtarët e Palmeiras qëndruan të lidhur në rresht për të nderuar të dy yjet portugezë.

Lidhja e Netos me Jotën ishte aq e thellë, saqë trajneri i Chelsea-t, Enzo Maresca, ishte i gatshëm ta përjashtonte atë nga ndeshja për shkak të gjendjes së tij emocionale. Të dy ishin rritur në të njëjtin sistem futbollistik dhe kishin luajtur bashkë për Wolves dhe kombëtaren e Portugalisë, ku së fundmi kishin fituar së bashku UEFA Nations League.

Maresca e përshkroi Neton si “shumë i trishtuar, ndoshta më shumë se kaq” dhe zbuloi se ai nuk kishte marrë pjesë në stërvitje pas marrjes së lajmit. “Do ta mbështesim në çdo rast. Qoftë nëse luan nesër apo jo, ne do të jemi pranë tij,” tha Maresca.

Ceremonia mortore për Diogo Jotën dhe Andre Silvën është planifikuar të mbahet të shtunën.

Presidenti i Federatës Portugeze të Futbollit, Pedro Proença, dhe Presidenti i Portugalisë, Marcelo Rebelo de Sousa, ishin të pranishëm në homazhet për dy futbollistët e ndjerë.

Federata Portugeze e Futbollit ishte një ndër shumë institucionet e botës së sportit që shprehu ngushëllimet e saj përmes një mesazhi prekës:

“Kemi humbur dy kampionë. Vdekja e tyre përbën një humbje të pariparueshme për futbollin portugez, dhe ne do të bëjmë gjithçka që është në dorën tonë për ta nderuar trashëgiminë e tyre çdo ditë.”