Hakan Çalhanoğlu ka qenë një nga emrat që së fundmi është përmendur në zyrat e “Santiago Bernabéu”.

Mesfushori turk 31-vjeçar është ofruar te Real Madrid përmes ndërmjetësuesve, pasi Inter Milan ka vendosur të hapë derën për largimin e tij.

Klubi italian kërkon një shitje me vlerë rreth 40 milionë euro, një shumë që në Madrid nuk janë të gatshëm ta paguajnë për një lojtar që nuk shihet si investim për të tashmen apo të ardhmen e projektit të ri të “Los Blancos”.

Sipas “DefensaCentral”, ndonëse profili i mesfushorit turk mund të jetë interesant për Xabi Alonson për shkak të aftësisë për të organizuar lojën dhe përvojës së tij, mosha dhe kostoja e operacionit kanë bërë që emri i tij të përjashtohet shpejt nga planet.

Trajneri bask kërkon një organizator në qendër të mesfushës që i përshtatet stilit të tij të futbollit me zotërim topi dhe vertikalitet, por njëkohësisht të jetë një zgjidhje afatgjatë.

Me një mesfushë të mbipopulluar dhe pa pritur largime, Real Madridi po analizon nëse lojtarë si Arda Güler apo i riu Franco Mastantuono mund të marrin përsipër rolin krijues.

Po ashtu, po shqyrtohet mundësia që Jude Bellingham të ketë më shumë ndikim në ndërtimin e lojës, edhe pse kjo mund të nënkuptojë një sakrificë në instinktin e tij për të shënuar gola.

Për momentin, Xabi dëshiron të vëzhgojë nga afër skuadrën gjatë fazës përgatitore përpara se të marrë vendime drastike.

Nënshkrimi me Çalhanoğlun është përjashtuar, dhe drejtuesit nuk do të ndërmarrin asnjë hap në merkato nëse nuk bëhet e qartë se nuk ka alternativa të vlefshme brenda skuadrës.

Prioriteti mbetet ruajtja e ekuilibrit të skuadrës pa rrezikuar modelin sportiv apo të ardhmen e klubit./GazetaExpress/