Ylli i NBA dhe Brooklyn Nets, Kevin Durant, bleu aksione në klubin e futbollit Philadelphia Union, që garon në Major League Soccer (MLS, liga e nivelit elitar në SHBA), duke u hyrë kështu në mesin e shumë basketbollistëve që kanë vendosur të investojnë në futboll.
Kevin Durant i ka blerë pesë për qind të aksioneve të klubit Philadelphia Union, ndërsa e ka opsionin t’i blejë edhe pesë për qind të tjera në një të ardhme të afërt, transmeton Gazeta Express.
Durant, dhjetë-herë All-Star në NBA, ka qenë dy herë kampin i NBA me Golden State Warriors, ndërsa e ka fituar edhe çmimin për lojtarin më të mirë MVP në NBA në vitin 2014, si dhe i ka dy medalje të arta Olimpike.
Durant tani bëhet basketbollisti i dytë i NBA All-Star që investon në futbollin e ligës amerikane MLS, pasi edhe James Harden bleu aksione të klubit Houston Dynamo, ndërsa ylli i NFL Russell Wilson bleu aksione në Seattle Sounders.
Edhe ylli i Los Angeles Lakers, LeBron James, është bërë pjesë e biznesit të futbollit, pasi që ai kishte blerë aksione në Liverpool në vitin 2011. /Gazeta Express/
