Pavarësisht se ishte një nga figurat kyçe në triumfin historik të Paris Saint-Germain në Ligën e Kampionëve, Gianluigi Donnarumma ka hedhur hije dyshimi mbi të ardhmen e tij te klubi francez.

Portieri italian, i cili shkëlqeu gjatë gjithë turneut dhe mbajti portën të paprekur në finalen vendimtare, nuk konfirmoi qëndrimin e tij në Paris për sezonin e ardhshëm. Në një deklaratë për Sky Sports, Donnarumma tha:
"Rinovim apo lamtumirë? Nuk kam një përgjigje të qartë. Dua të shijoj këtë moment të jashtëzakonshëm dhe më pas do të shohim çfarë vendimi do të merret."

Këto fjalë kanë ngjallur reagime të shumta mes tifozëve dhe mediave franceze, duke pasur parasysh rolin vendimtar që ai ka pasur në fitoren e parë evropiane të PSG-së nën drejtimin e Luis Enrique.

Në moshën 26-vjeçare, Donnarumma mbetet një nga portierët më të vlerësuar në arenën ndërkombëtare, dhe një largim i mundshëm mund të tërheqë interesin e klubeve më të mëdha në Europë.

Për momentin, e ardhmja e tij mbetet e paqartë, dhe mbetet të shihet pas përfundimit të pushimeve nëse do të vazhdojë aventurën në “Parc des Princes” apo do të nisë një kapitull të ri në karrierën e tij./GazetaExpress/