Real Madrid aktualisht po përballet me një krizë të madhe me lëndime në mbrojtje, megjithatë lajmi i mirë është se Eder Militao nuk është prekur. Mbrojtësi ka kaluar dy vite shumë të vështira, pasi dëmtoi ligamentet e gjurit (ACL) në të dyja gjunjët, me vetëm 15 muaj diferencë mes tyre.

Militao pësoi një goditje të vogël në kyçin e këmbës disa javë më parë, por përveç kësaj ka qenë pa lëndime që nga kthimi i tij nga dëmtimi i dytë në gju. Ai është rikthyer edhe në ekipin kombëtar të Brazilit, dhe sipas Marca-s, ka folur për mediat rreth procesit të tij të rikuperimit, të cilin e ka përshkruar si tepër të vështirë.

“Pas dëmtimit të dytë, mendova ta lë futbollin. Nuk është e lehtë të kalosh gjithçka që kalova. Falë familjes sime dhe besimit tim, sot jam këtu, i fortë dhe gati të jap maksimumin.

Kanë qenë dy vite të vështira, me dy lëndime shumë të komplikuara. Të dytën e përballon ndryshe, sepse e njeh tashmë procesin. Nuk është e lehtë. Duhet të mbështetesh shumë te familja, te Zoti… Të ndryshon rutina, ajo që je mësuar të bësh, stërvitjet. Papritur, je në shtëpi, duke u varur nga të tjerët që të ndihmojnë. Falë Zotit, u shërova nga dëmtimet dhe u ktheva në nivelin më të lartë, gjë që nuk është e lehtë.”

Militao ka qenë një lojtar shumë i rëndësishëm për Real Madridin në fillim të këtij sezoni, sidomos tani që Antonio Rudiger është jashtë fushave për një kohë të gjatë për shkak dëmtimi. Ai ka krijuar një partneritet të fortë në qendër të mbrojtjes me përforcimin veror Dean Huijsen, dhe për skuadrën e Xabi Alonsos për të qenë e suksesshme, ata do të duhet të jenë në formën më të mirë gjatë gjithë sezonit.

Real Madrid shpreson që Militao të kalojë pa probleme pushimin ndërkombëtar, pasi ai do të jetë i domosdoshëm për ndeshjet e ardhshme – përfshirë edhe “El Clasico”-n që zhvillohet më vonë këtë muaj.