Legjenda e Interit, Javier Zanetti, ka lavdëruar në mënyrë të veçantë sulmuesin argjentinas Lautaro Martinez, duke e cilësuar bashkëkombasin e tij si “një nga më të mëdhenjtë” në historinë e klubit.
Nënkryetari i Interit foli për FIFA-n, përmes CalcioMercato, në prag të nisjes së fushatës së klubit në Kupën e Botës për Klube, ku Nerazzurrët do të përballen me skuadrën meksikane Monterrey në orët e para të mëngjesit të së mërkurës.
Duke folur për Martinez, Zanetti u shpreh: “Ai është pika jonë e referimit” dhe “është një nga lojtarët më të rëndësishëm në historinë e Interit, pa dyshim që do ta vendosja ndër më të mëdhenjtë.”
Ish-mbrojtësi gjithashtu shprehu besimin e tij te trajneri i ri i Interit, Cristian Chivu, duke thënë: “Kemi shumë besim te Cristiani, e njoh shumë mirë. Ka qenë shok skuadre me mua, ndaj e di që është një person i jashtëzakonshëm dhe jam i sigurt që do të bëjë një punë të shkëlqyer.”
Chivu dhe Martinez shpresojnë për një paraqitje të suksesshme në Kupën e Botës për Klube, që mund t’i japë skuadrës besim për sezonin e ri në Serie A, pas humbjes së ngushtë të titullit kampion ndaj Napolit në sezonin që sapo përfundoi./GazetaExpress/
