Atletico Madrid është pranë finalizimit të marrëveshjes për Matteo Ruggeri, mbrojtësin e majtë të Atalantës, i cili pritet të jetë titullar i ri në atë pozicion. Reinildo Mandava është në prag largimi, ndërsa Javi Galan pritet të mbetet si zëvendësues pas paraqitjeve zhgënjyese.

Megjithatë, Ruggeri nuk ishte objektivi i parë për këtë rol. Klubi madrilen kishte në shënjestër fillimisht emra më të mëdhenj si Theo Hernandez dhe Andy Robertson.

Hernandez ishte përparësia kryesore, me interesimin e Atleticos të konfirmuar që në fillim të muajit. Por pas disa ofertave të dërguara te Milani që nuk arritën kërkesat financiare të klubit italian, Atleti hoqi dorë. Francezi tani pritet të transferohet te Al Hilal.

Sipas Marca, një ndër arsyet kryesore për të mos vazhduar me Hernandezin ishte reagimi negativ i tifozëve të klubit. Kujtojmë se Theo doli nga akademia e Atleticos së bashku me vëllain e tij, Lucas Hernandez, por zgjodhi të tradhtonte klubin në vitin 2017, duke firmosur me Real Madridin – një vendim që u prit shumë keq nga tifozët e "Los Colchoneros".

Kur u raportua se ai mund të rikthehej, pati reagime të forta nga mbështetësit e klubit dhe drejtuesit vendosën të mos rrezikonin më tej. Natyrisht, edhe çmimi i lartë i kërkuar nga Milani (rreth 30 milionë euro) ishte një pengesë serioze. Për krahasim, Ruggeri – i cili është pesë vite më i ri – po blihet për rreth 10 milionë euro më pak.

Atletico ka qenë mjaft aktive në javën e fundit në merkato. Përveç Ruggerit, klubi është pranë marrëveshjeve edhe për Johnny Cardoso dhe Alex Baena, duke ndërtuar një skuadër me synime serioze për sezonin e ri.

Ask ChatGPT