Martin Zubimendi është tashmë lojtar i Arsenalit, pasi u prezantua javën e kaluar si përforcimi më i ri i mesfushës përkrah Declan Rice, me synimin për të krijuar një dyshe dominante nga muaji gusht e tutje.

Mesfushori i formuar në akademinë e Real Sociedad kaloi në “Emirates” për një shumë totale prej 70 milionë eurosh, pavarësisht interesimit të madh nga Real Madrid dhe pranisë së idhullit të tij, Xabi Alonso, në stolin e kampionëve evropianë.

Real Madrid dihet për fuqinë e tij në negociata, siç është dëshmuar me transferimet e Jude Bellingham dhe Dean Huijsen, të cilët ishin më afër klubeve angleze para ndërhyrjes së "Los Blancos". Por këtë herë, ndikimi i tyre nuk ishte i mjaftueshëm.

Në një intervistë për mediat e Arsenalit pas prezantimit, Zubimendi e cilësoi trajnerin e Real Madridit, Xabi Alonso, si futbollistin e tij spanjoll të preferuar të të gjitha kohërave – një detaj që nuk kaloi pa u vënë re nga tifozët madrilenë.

Sipas Cadena SER, Zubimendi e kishte vendosur që një vit më parë se do të kalonte te Arsenali. Londinezët kishin nisur negociatat për Mikel Merinon dhe Zubimendin që në verën e kaluar, por Real Sociedad nuk dëshironte t’i humbiste të dy në të njëjtën kohë. Merino u shit, ndërsa u arrit një marrëveshje verbale që Zubimendi të bashkohej me Arsenalin këtë verë.

Për këtë arsye, mundësia e Real Madridit për të ndërhyrë ka qenë zero, edhe pse trajneri Alonso – ish-trajner i Zubimendit te ekipi B i Sociedad – mendohej se do të ndërhynte personalisht për ta sjellë në Madrid.

Zubimendi gjithashtu refuzoi një ofertë nga Liverpool në të njëjtën kohë, duke e bërë të qartë se vendimi i tij për t’u transferuar te Arsenali ishte marrë shumë më herët.

Spanjolli tani është gati të nisë një faqe të re në karrierën e tij në Premier League, me shumë pritshmëri për ndikimin që do të ketë në skuadrën e Mikel Artetës./GazetaExpress/