Një stadium me kapacitet rreth 32,000 ulësesh, i cili ishte planifikuar të priste ndeshje në Kupën e Botës 2030, është tërhequr nga roli i organizatorit.
Kupa e Botës 2026, që do të organizohet nga Shtetet e Bashkuara të Amerikës, Kanadaja dhe Meksika, pritet të jetë një nga turnetë më të mëdhenj në histori, me FIFA-n që pret shitje rekord të biletave.
Megjithatë, ka pasur disa sfida logjistike për shkak të luftës së vazhdueshme mes SHBA-së dhe Iranit, ndërsa pati edhe shqetësime të përkohshme për sigurinë e ndeshjeve në Meksikë për shkak të rasteve të dhunës së lidhur me bandat kriminale.
Sa i përket Kupës së Botës 2030, një rekord prej gjashtë shtetesh do ta organizojnë turneun.
Nga një ndeshje do të zhvillohet në Uruguai, Argjentina dhe Paraguai për të shënuar 100-vjetorin e FIFA-s, ndërsa pjesa më e madhe e turneut do të zhvillohet në Spanjë, Portugali dhe Marok.
Në mesin e 10 stadiumeve spanjolle të përzgjedhura fillimisht ishte edhe “Estadio Riazor”, me kapacitet 32,471 ulëse, shtëpia e klubit Deportivo La Coruña, kampion i La Ligës në sezonin 1999/2000.
Ky stadium ka pritur gjashtë ndeshje të kombëtares së Spanjës, e fundit në vitin 2009, si dhe disa ndeshje të Kupës së Botës 1982.
Sipas rregullave të FIFA-s, stadiumet që presin ndeshje të Kupës së Botës duhet të kenë të paktën 40,000 ulëse.
Drejtuesit e Deportivos kishin shqyrtuar mundësinë e zgjerimit të stadiumit deri në 48,000 vende.
Megjithatë, klubi nuk ka luajtur në La Liga që nga viti 2018 dhe madje kishte rënë deri në kategorinë e tretë, përpara se të rikthehej në Segunda División në vitin 2024.
Në atë kohë, edhe klubet Valencia dhe Celta Vigo kishin shprehur zhgënjimin që stadiumet e tyre nuk u përzgjodhën për turneun.
Në një deklaratë të publikuar në vitin 2024, Deportivo kishte theksuar se prioriteti i klubit është ruajtja e stadiumit aktual sipas nevojave të tifozëve dhe investimi në zhvillimin e klubit, duke mos rrezikuar qëndrueshmërinë financiare.
Të hënën në mëngjes, Deportivo La Coruña, Këshilli Provincial i A Coruña dhe bashkia e qytetit konfirmuan planet për modernizimin e stadiumit.
Megjithatë, si pjesë e këtij vendimi, stadiumi do të heqë dorë nga e drejta për të pritur ndeshje të Kupës së Botës 2030.
Kryetarja e bashkisë së A Coruñas, Inés Rey, deklaroi se qyteti dëshironte të organizonte ndeshje të Kupës së Botës, por jo “me çdo çmim”.
Ndërsa presidenti i Këshillit Provincial, Valentín González Formoso, theksoi se A Coruña meriton një angazhim të qartë për përmirësimin e infrastrukturës sportive, gjë që pritet të konkretizohet në javët dhe muajt e ardhshëm./GazetaExpress/
