Departamenti i Drejtësisë i Shteteve të Bashkuara (DOJ) ka hequr nga faqja zyrtare mijëra dokumente që lidhen me hetimin ndaj Jeffrey Epstein, pasi viktimat deklaruan se identitetet e tyre ishin zbuluar gabimisht. Dokumentet u publikuan të premten dhe përfshinin rreth tre milionë faqe shtesë, por sipas avokatëve të viktimave, redaktimet ishin të paplota dhe të gabuara, shkruan A2 CNN.

Në disa raste, ishin publikuar adresa emaili, të dhëna bankare dhe foto ku viktimat mund të identifikoheshin qartë, duke shkaktuar trauma të reja për rreth 100 të mbijetuar. Disa prej tyre deklaruan se kishin marrë kërcënime serioze pas publikimit të informacionit personal.

DOJ pranoi se gabimet kishin ardhur si pasojë e “gabimeve teknike ose njerëzore” dhe njoftoi se të gjitha dokumentet e sinjalizuara janë hequr për riredaktim. Sipas institucionit, vetëm 0.1% e faqeve të publikuara përmbanin të dhëna të pambrojtura, por avokatët e viktimave e cilësuan publikimin si shkeljen më të rëndë të privatësisë së viktimave në historinë amerikane.

Dokumentet u publikuan pas një ligji të miratuar nga Kongresi, i cili detyronte qeverinë federale të bënte publike të gjitha materialet që lidhen me çështjen Epstein, me kushtin që identitetet e viktimave të mbroheshin plotësisht.

Jeffrey Epstein vdiq në vitin 2019 në një burg në Nju Jork, ndërsa priste gjyqin për akuza për trafikim seksual.