Ndarja nga Charles-i dhe divorci mbetet një nga periudhat më të vështira në jetën e Lady Dianës. Pas ndarjes formale në dhjetor 1992 dhe divorci të finalizuar katër vite më vonë, në mes kishte gjithçka: prona, fonde, por edhe një çështje simbolike që për Dianën kishte peshë të madhe humbja e titullit “Lartësia e Saj Mbretërore, Princesha e Uellsit”, diçka që ajo mendonte se i takonte si nëna e trashëgimtarit të ardhshëm.

Në atë klimë emocionalisht të paqëndrueshme, Diana u afrua edhe më shumë me astrologë, parashikues dhe fallxhore, duke kërkuar një lloj orientimi për të ardhmen. Mes figurave më të afërta ishte Rita Rogers, e njohur përmes një miku të përbashkët dhe e frekuentuar rregullisht nga Diana që prej vitit 1994 në pronën e saj në Derbyshire.

Sipas asaj që raportohet, është gjetur një letër e shkruar nga Diana drejtuar Rita Rogers, ku princesha e falënderon për mirësinë dhe bujarinë, duke e cilësuar miqësinë e tyre si shumë të çmuar. Letra mban datën 23 tetor 1995, rreth një muaj para intervistës së famshme në BBC Panorama me gazetarin Martin Bashir.

Letra (dy faqe), e nënshkruar “me dashuri, Diana”, pritet të dalë në ankand në Londër, te Chiswick Auctions, me një vlerësim të përafërt 1,500–2,000 paund. Ankandi, sipas njoftimit, është planifikuar për 31 janar. Në shpjegimet shoqëruese theksohet se Diana kërkonte shpesh mbështetje emocionale dhe udhëzim te figura të tilla, sidomos në vitet e trazimeve personale.

Një nga detajet më të përmendura është se hera e fundit kur Diana e takoi Rita Rogers ishte më 12 gusht 1997, vetëm pak ditë para vdekjes tragjike në Paris. Në atë vizitë ishte edhe Dodi Al-Fayed, i cili, sipas rrëfimit të Rogers, kishte dashur ta takonte mediumen pas komenteve entuziaste të Dianës.

Sipas historisë së treguar, çifti mbërriti me helikopter privat në shtëpinë e Rogers në Loëer Pilsley (Derbyshire) dhe takimi zgjati rreth 90 minuta. Rogers ka thënë se i kishte parashikuar Dianës se do të takonte “një burrë me origjinë të huaj” dhe me inicialin “D”, i lidhur me industrinë e filmit, një detaj që, gjithmonë sipas saj, Diana e kishte kujtuar kur e telefonoi më pas për ta treguar se ishte në një jaht me “Dodi Fayed”.

Episodi i vizitës te ajo u rikrijua edhe në sezonin e gjashtë të “The Croën”. Aktorja Elizabeth Debicki, e cila interpretoi Dianën dhe fitoi një Emmy për rolin, ka rrëfyer se skena e vizitës te mediumja ishte ndër ato që i kishte mbetur në mendje, madje ka thënë se mori disa karta kontakti nga set-i si kujtim mes tyre, emrin “Rita Rogers”.

Rita Rogers, sot 82 vjeçe, përshkruhet si një figurë e njohur në qarqet aristokratike të Londrës. Ajo ka treguar se Diana e telefononte shpesh, “të paktën një herë në javë”, si për të pyetur si ishte, ashtu edhe për leximet. Rogers e kujton Dianën si të afërt, të ngrohtë dhe bujare në gjeste të vogla: përqafime, dhurata, dhe një lloj humori që e bënte raportin “të lehtë”, edhe kur jeta e princeshës s’ishte aspak e tillë.

Në fund, këto rrëfime e vendosin sërish Dianën në atë profil që publiku e ka mbajtur mend: një figurë jashtë protokollit, e ndjeshme, që në periudha të vështira kërkonte kuptim diku mes realitetit të ashpër të një divorci mbretëror dhe nevojës njerëzore për një fjalë ngushëlluese, një shenjë, një orientim. /Panorama