Policia e Zelandës së Re i ka ndërprerë kërkimet për gjetjen e trupave të dy personave të zhdukur pas shpërthimit të vullkanit në Ishullin e Bardhë.
Nga shpërthimi i vullkanit këtë muaj vdiqën 19 persona, përfshirë dy që ende nuk janë gjetur.
Besohet se trupat e Winona Jane Langford-it, 17 vjeçe, dhe Hayden Bryan Marshall-Inman-it, 40 vjeç, ndodhen diku në ujërat përreth ishullit ku shpërtheu vullkani.
Autoritetet policore thanë se vendimi për ndërprerjen e kërkimeve erdhi pas operacioneve të vazhdueshme përgjatë bregdetit dhe përmes ajrit.
“Familjet e dy personave të zhdukur janë informuar për këtë vendim. Policia mbetet e gatshme për të vepruar, nëse për këtë rast vijnë informata të reja”, tha zyrtari policor, Andy McGregor.
Shpërthimi i vullkanit në Ishullin e Bardhë ndodhi më 9 dhjetor. Në momentin e shpërthimit, në këtë ishull ndodheshin 47 persona, 24 prej tyre australianë, nëntë amerikanë, pesë nga Zelanda e Re, katër nga Gjermania, dy nga Kina, dy nga Britania e Madhe dhe një nga Malajzia.
Javën e kaluar, policia i publikoi emrat e 17 viktimave. Personat e vdekur ishin nga Australia, Zelanda e Re dhe Shtetet e Bashkuara, shkruan “BBC”, transmeton Gazeta Express.
