Presidenti i Ukrainës, Volodymyr Zelensky, ka bërë të ditur se disa aleatë të Kievit kanë dhënë “sinjale” për mundësinë e kufizimit të sulmeve me rreze të gjatë ndaj sektorit energjetik rus, për shkak të rritjes së çmimeve globale të energjisë. Ai theksoi se Ukraina është e gatshme të përgjigjet në mënyrë reciproke nëse Vladimir Putin ndalon sulmet ndaj infrastrukturës energjetike ukrainase dhe shtoi se Kievi është i hapur për një armëpushim gjatë Pashkëve.

Sipas burimeve, edhe zyrtarë amerikanë kanë përcjellë mesazhe të ngjashme, ndërsa sinjalet fillestare dyshohet se kanë ardhur nga Moska. Pas një vizite në Lindjen e Mesme, Zelensky njoftoi marrëveshje për mbështetje energjetike, përfshirë furnizim njëvjeçar me naftë për Ukrainën, shkruan The Guardian, përcjell KosovaPress.

Ndërkohë, Ukraina ka nënshkruar një marrëveshje 10-vjeçare mbrojtjeje me Bullgarinë për prodhimin e përbashkët të armëve, përfshirë dronët, një zhvillim që synon forcimin e bashkëpunimit të sigurisë dhe përshtatjen me zhvillimet e shpejta teknologjike në luftë.

Në terren, sulmet ruse në rajonet qendrore dhe veriore të Ukrainës kanë shkaktuar të paktën dy viktima dhe mbi 20 të plagosur. Në rajonin e Poltavës dhe atë të Dnipropetrovskut janë raportuar viktima nga sulmet me dronë dhe artileri, ndërsa në Sumy janë plagosur 13 persona, përfshirë një fëmijë.

Në zhvillime të tjera, SHBA ka shtyrë afatin për kompanitë që synojnë të blejnë asetet e jashtme të kompanisë ruse Lukoil, me vlerë rreth 22 miliardë dollarë, pas vendosjes së sanksioneve në vitin 2025.

Nga ana tjetër, miliarderi rus në mërgim Mikhail Khodorkovsky ka deklaruar se sanksionet nuk e kanë dobësuar ndjeshëm pozitën e Putinit. Sipas tij, Perëndimi gabimisht ka besuar se oligarkët mund të ushtrojnë presion ndaj Kremlinit, duke theksuar se në një sistem autoritar, pasuria pa fuqi politike nuk ka ndikim real.