Kur gjithçka tregonte se Martín Zubimendi do të vishte fanellën e Arsenalit sezonin e ardhshëm, mesfushori ka vendosur të pezullojë çdo vendim përfundimtar. Në “Emirates” ishin të bindur se marrëveshja ishte drejt mbylljes, por lojtari i Real Sociedad ka kërkuar më shumë kohë për të reflektuar, gjë që ka shkaktuar shqetësim në Londër.

Dhe në orët e fundit, një klub i ri është futur në garë për firmën e tij: Real Madrid.

Burime pranë lojtarit bëjnë me dije se shfaqja e klubit madrilen ka ndryshuar plotësisht situatën. Zubimendi, që ka qenë pjesë kyçe si te Real Sociedad, ashtu edhe te përfaqësuesja spanjolle, po e konsideron seriozisht mundësinë për t’u transferuar në Santiago Bernabéu, raporton “Fichajes”.

Sipas Marca, arsyeja kryesore është interesi i drejtpërdrejtë i Xabi Alonsos, trajnerit të ri të Real Madridit, i cili tashmë ka shprehur dëshirën që ta ketë Zubimendin si pjesë kyçe të projektit të tij.

Sezonin e kaluar, lojtari nga San Sebastián refuzoi oferta të rëndësishme, përfshirë një nga Liverpool dhe një tjetër nga Barcelona. Në atë kohë, ai zgjodhi stabilitetin dhe të vazhdonte zhvillimin e tij në shtëpi. Tani, megjithatë, ai ndjen se ka ardhur momenti për të ndryshuar drejtim.

Edhe pse në Angli e konsideronin të mbyllur kalimin e tij në Premier League, Zubimendi ende nuk ka marrë një vendim përfundimtar. Ai nuk dëshiron të nxitohet dhe kërkon të zgjedhë me qetësi hapin e radhës në karrierë.

E vetmja gjë e sigurt për momentin është se nuk do të marrë pjesë në Kupën e Botës për Klube dhe se po e ndjek me vëmendje opsionin Real Madrid.
E ardhmja e Zubimendit mbetet e pasigurt, por Reali po fiton terren si destinacioni i tij i ardhshëm.