BFU rekomandon që përdoruesit të parashikojnë situatat në rrugë dhe të përshtatin shpejtësinë sipas kushteve.

Numri i aksidenteve serioze që përfshijnë biçikleta elektrike dhe skuterë elektrikë në Zvicër është i lartë. Vitin e kaluar, 27 persona humbën jetën në aksidente. Këshilli Zviceran për Parandalimin e Aksidenteve u bën thirrje përdoruesve të parashikojnë situatat në rrugë dhe të respektojnë rregullat, shkruan Swissinfo.ch, transmeton albinfo.ch.

Sipas Këshillit Zviceran për Parandalimin e Aksidenteve (BFU), vitin e kaluar 586 persona me biçikleta elektrike dhe 152 me skuterë elektrikë janë lënduar rëndë; ndërsa 24 drejtues të e-bike dhe tre persona me e-scooter kanë humbur jetën në aksidente.

BFU thekson se shpejtësia më e lartë është arsyeja kryesore për rrezikun e madh, pasi rrit distancën e frenimit dhe zvogëlon kohën e reagimit. Gjithashtu, këto mjete nuk kanë zonë mbrojtëse (crumple zone). Përdoruesit e tjerë të rrugës shpesh i vërejnë shumë vonë për shkak të profilit të tyre të ngushtë ose e nënvlerësojnë shpejtësinë e tyre.

BFU rekomandon që përdoruesit të parashikojnë situatat në rrugë dhe të përshtatin shpejtësinë sipas kushteve. Po ashtu, është e rëndësishme të përdoren sinjale të qarta me dorë gjatë kthimeve, të kenë drita funksionale dhe të mbajnë helmetë si dhe rroba me ngjyra të çelëta për dukshmëri më të mirë.

Helmetat janë të detyrueshme për e-bike më të shpejta. Në përgjithësi, biçikletat dhe skuterët elektrikë lejohen të përdoren nga mosha 14 vjeç me patentë për mopeda dhe nga 16 vjeç pa patentë. Për të gjitha mjetet elektrike, dritat janë të detyrueshme edhe gjatë ditës, ndërsa kufiri i alkoolit është 0.5 promil.