Ishte parashikuar të zgjaste deri në minutat e fundit, dhe ashtu ndodhi. Megjithatë, Real Betis e ka arritur transferimin që aq shumë e dëshironte këtë verë, Antonio de Triana, siç e quajnë tani me përkëdheli. Los Verdiblancos e mbyllin merkaton me një goditje të madhe, duke e bërë zyrtare lëvizjen për Antony.

Që herët të hënën, pas një jave raportimesh të pakonfirmuara, mohimesh dhe deklaratash, u raportua se Betis dhe United më në fund kishin arritur një marrëveshje në negociatat e tyre. United ishte i dëshpëruar ta mbyllte shitjen përfundimtare të brazilianit prej 95 milionë eurosh, ndërsa Betis nuk mund t’i afrohej kërkesës së tyre prej 40-50 milionë euro.

Sipas raporteve të mëparshme, marrëveshja do të vlejë maksimumi 25 milionë euro, prej të cilave 3 milionë janë bonuse. Marrëveshja do ta lejojë United të mbajë 50% të të drejtës nga shitja e ardhshme, që do të thotë se nëse Betis e shet më vonë për 30-50 milionë euro, atëherë United mund të rikuperojë shumën që kërkonte. Ende nuk është e qartë se sa ulje page ka pranuar Antony për ta realizuar këtë marrëveshje, ose nëse “Djajtë e Kuq” kanë rënë dakord të shlyejnë një pjesë të kontratës së tij, por duket e sigurt që është arritur një kompromis për pagën e brazilianit.

Antony ka pranuar se nuk po kalonte momentin më të mirë te Old Trafford, por e rigjeti shkëlqimin sezonin e kaluar gjatë huazimit për gjashtë muajt e fundit. Ai ka firmosur një kontratë pesëvjeçare me Betisin, i cili synon sërish kualifikimin në Evropë, si dhe një ecuri në Kupën e Mbretit ose në Europa League, pasi sezonin e kaluar arriti në finalen e Conference League.

Sezonin e kaluar Antony shënoi nëntë gola dhe dha gjashtë asistime në 26 paraqitje në Benito Villamarin, shumë prej tyre vendimtare për skuadrën e Manuel Pellegrinit. Kiliani do të ketë një yll në repartin ofensiv për t’u mbështetur./GazetaExpress/