Arsenal ka arritur marrëveshje me Bukayo Saka për një kontratë të re afatgjatë, duke siguruar të ardhmen e një prej yjeve kryesorë të skuadrës.

Sipas raportimeve të The Athletic, marrëveshja e re e sulmuesit anglez do të jetë pesëvjeçare dhe do ta mbajë atë në “Emirates” deri në vitin 2031.

Klubi londinez ka qenë prej kohësh në negociata me përfaqësuesit e 24-vjeçarit dhe tashmë ka finalizuar një kontratë të përmirësuar, e cila reflekton rritjen dhe rëndësinë e Sakas në skuadrën e Mikel Artetës.

Rinovimi i Sakas vjen pas punës së mirë të bordit të Arsenalit për të blinduar shtyllat kryesore të ekipit, pasi më herët kanë rinovuar edhe William Saliba, Gabriel Magalhaes, si dhe talentet e akademisë Myles Lewis-Skelly dhe Ethan Nwaneri.

I dalë nga akademia Hale End, Saka është shndërruar në fytyrën e Arsenalit dhe një nga anësorët më efektivë në Europë. Ai ka zhvilluar 217 paraqitje në Premier League, me 57 gola dhe 48 asistime, ndërsa në mungesë të Martin Ødegaard ka mbajtur edhe shiritin e kapitenit.

Në nivel ndërkombëtar, Saka mbetet një nga figurat kyçe të Anglisë në prag të Kupës së Botës 2026, duke numëruar 14 gola në 48 ndeshje me përfaqësuesen angleze. /GazetaExpress