Klubi i madh turk, Fenerbahçe, ka njoftuar sot zyrtarisht ndarjen e rrugëve me trajnerin e njohur portugez, Jose Mourinho, vetëm pas një sezoni në krye të skuadrës.
Vendimi vjen pas eliminimit zhgënjyes nga play-offi i Ligës së Kampionëve ndaj Benficas, shkruan Gazeta Express.
Në komunikatën zyrtare, Fenerbahçe theksoi:
“Që nga sezoni 2024-2025 Jose Mourinho ka ushtruar detyrën e trajnerit të ekipit tonë të parë. Sot rrugët tona janë ndarë. E falënderojmë për gjithë kontributin e dhënë për skuadrën tonë deri më tani dhe i urojmë suksese në karrierën e tij të ardhshme.”
Mourinho ishte prezantuar me bujë verën e kaluar, duke ngritur pritshmëritë e tifozëve për rikthimin e Fenerbahçes në majën e futbollit turk dhe konkurrueshmërinë në arenën evropiane.
Mirëpo, eliminimi nga Benfica në Champions dhe rezultatet e luhatshme në kampionat kanë detyruar klubin të marrë këtë vendim të bujshëm.
