AC Milan ka zyrtarizuar emërimin e Massimiliano Allegrit si trajner i ri i ekipit, duke shënuar kështu rikthimin e tij në “San Siro” pas më shumë se një dekade.

Në një komunikatë për media, klubi kuqezi njoftoi:
"AC Milan ka kënaqësinë të njoftojë se Massimiliano Allegri është emëruar trajner i ekipit të parë të meshkujve."

I lindur në Livorno më 11 gusht 1967, Allegri ka pasur një karrierë të gjatë si futbollist në Serie A me ekipe si Pisa, Pescara, Cagliari, Perugia dhe Napoli, përpara se të niste rrugëtimin si trajner në vitin 2002. Ai ka drejtuar ekipe si Aglianese, SPAL, Grosseto dhe Sassuolo, përpara se të debutonte në elitën e futbollit italian me Cagliarin në vitin 2008.

Allegri iu bashkua Milanit për herë të parë në vitin 2010 dhe fitoi Scudetton e 18-të të klubit në sezonin e tij të parë. Një vit më vonë, ai shtoi në vitrinën e Milanit edhe Superkupën e Italisë. Pas largimit nga Milani, ai mori drejtimin e Juventusit, ku në dy periudha (2014–2019 dhe 2021–2024) fitoi 5 tituj kampion, 5 Kupa të Italisë dhe 2 Superkupa.

Me këtë rikthim, Milani shpreson të rifillojë një epokë të suksesshme nën drejtimin e një trajneri me përvojë dhe rekorde të provuara në futbollin italian.