UEFA ka konfirmuar se vendimi për ndeshjen e Serie A mes Milanit dhe Comos në Australi është shtyrë, pasi Komiteti Ekzekutiv dëshiron të zhvillojë një “rund konsultimesh” me palët e interesuara.

Çështja u diskutua në mbledhjen e sotme të UEFA-s në Tiranë, ku u përfshi edhe propozimi i LaLigës për të zhvilluar sfidën Barcelona–Villarreal në Miami. Këto iniciativa do të ishin historike, pasi për herë të parë liga të mëdha evropiane do të luanin ndeshje zyrtare jashtë kontinentit.

Në deklaratën zyrtare thuhet:

“Komiteti e konsideron këtë një çështje të rëndësishme dhe në rritje, por dëshiron të dëgjojë të gjithë aktorët e futbollit evropian, përfshirë edhe tifozët, përpara se të marrë një vendim final.”

Nuk dihet ende se sa do të zgjasë procesi i konsultimeve, ndërsa Serie A dhe LaLiga mbeten në pritje.

Kujtojmë që Milan–Como nuk mund të luhet në San Siro në shkurt 2026 për shkak të ceremonisë hapëse të Lojërave Olimpike Dimërore Milano–Cortina. /GazetaExpress/