Kreu i delegacionit të BE-së në Serbi, Sem Fabrizi, ka thënë se ky Union po inkurajon formimin e Qeverisë në Kosovë dhe vazhdimin e dialogut me Serbinë.

Kreu i delegacionit të Bashkimit Evropian në Serbi, Sem Fabrizi, tha se Bashkimi Evropian po inkurajon formimin e një qeverie në Prishtinë dhe vazhdimin e dialogut mes Kosovës e Serbisë, të ndërmjetësuar nga BE-ja.

“Unioni do të vazhdojë të udhëheqë këtë proces, të krijuar nga Kombet e Bashkuara dhe të mbështetur nga vendet anëtare të BE-së. Përfaqësuesi i Lartë i BE-së e ka sqaruar se kjo është një përparësi dhe tashmë ka njoftuar një udhëtim të fundit në Prishtinë dhe Beograd. Dhe po, taksa duhet të hiqet”, tha ai për Blicin serb.

Duke folur për zgjedhjet në Serbi, ai tha se BE “inkurajon të gjithë akterët të rikthejnë debatin politik atje ku ajo i përket – në Kuvend, një vend për debat demokratik dhe përfaqësim të popullit”.

Kujtojmë se Kosova pas tre muajsh zgjedhje ende është pa Qeveri dhe krijim të institucioneve, kjo për shkak të vonesave që po bëhen nga partia e Albin Kurtit, e cila nuk po mund të krijojë koalicion me LDK-në.